शिक्षण आयुक्त सचिंद्र प्रताप सिंह यांनी प्राथमिक व माध्यमिक संचालकांना स्पष्ट सूचना दिल्या आहेत की, संचमान्यतेनुसार अतिरिक्त शिक्षकांचे समायोजन करूनच उर्वरित खरे रिक्त पदांच्या जाहिराती पवित्र पोर्टलवर प्रकाशित व्हाव्यात. विद्यार्थ्यांची संख्या कमी झाल्यास, व शिक्षक पदे कमी असल्यास, जाहिरात आणि प्रत्यक्ष रिक्त पदांची खातरजमा तात्काळ करावी.

आयुक्त सिंह यांच्या म्हणण्यानुसार, 2024-25 च्या संचमान्यतेप्रमाणे मंजूर, कार्यरत आणि रिक्त पदांचा विचार करूनच भरतीची प्रक्रिया राबवावी. जर पद मंजूर नसेल तर उमेदवारांना नेमले जाऊ शकत नाही, हे लक्षात घेऊनच पोर्टलवर जाहिराती टाकाव्यात.

सर्व शाळांमध्ये भरती करताना सर्व उमेदवारांना समान संधी मिळावी यासाठी उच्च गुणवत्ताधारक उमेदवारांची निवड बुद्धिमत्ता चाचणी 2022 च्या गुणांवर आधारित केली जात आहे.

आत्तापर्यंत 15,063 पदे मुलाखतीशिवाय आणि 2,771 पदे मुलाखतीसह असे एकूण 18,034 शिक्षक पदांसाठी शिफारसी झाल्या आहेत. आता 20 जानेवारी 2025 पासून दुसऱ्या टप्प्यातील भरतीसाठी नव्या जाहिरातींची प्रक्रिया सुरू करण्यात आली आहे.

2024-25 मध्ये संचमान्यता बदलल्याने काही व्यवस्थापनांकडे पदे कमी होण्याची शक्यता नाकारता येत नाही. त्यामुळे सर्व जाहिराती आणि रिक्त पदांची शहानिशा करूनच पुढील कार्यवाही करण्याचे निर्देश देण्यात आले आहेत.