मित्रांनो, जर आपण फ्रेशर आहेत आणि इंटर्नशिप करण्यासाठी इच्छुक असाल तर हि एक आपल्या साठी मस्त संधी आहे. राष्ट्रीय माहिती केंद्र (NIC) व इलेक्ट्रॉनिक्स आणि माहिती तंत्रज्ञान मंत्रालय (MeitY) अंतर्गत २०२५ साठी ‘डिजिटल इंडिया इंटर्नशिप योजना’ जाहीर करण्यात आली आहे. ही योजना भारतातील विद्यार्थ्यांना आधुनिक तंत्रज्ञानात प्रत्यक्ष अनुभव घेण्याची आणि देशाच्या डिजिटल क्रांतीत योगदान देण्याची संधी उपलब्ध करून देते. या अंतर्गत आपण या इंटर्न प्रोग्राम ला जॉईन करू शकता. 

अर्ज करण्याची अंतिम तारीख आणि कालावधी
या इंटर्नशिपसाठी अर्ज करण्याची अंतिम तारीख ३० एप्रिल २०२५ आहे. निवड झालेल्या विद्यार्थ्यांना २ जून ते ३१ जुलै २०२५ या कालावधीत इंटर्नशिपसाठी बोलावलं जाईल. ही इंटर्नशिप राष्ट्रीय स्तरावर प्रतिष्ठेची मानली जाते.

क्षेत्रात तज्ज्ञांसोबत काम करण्याची संधी
या योजनेत विद्यार्थ्यांना ब्लॉकचेन, आर्टिफिशियल इंटेलिजन्स, मशीन लर्निंग, सायबर सुरक्षा, क्वांटम संगणक अशा नव्या आणि नाविन्यपूर्ण क्षेत्रांत प्रत्यक्ष प्रकल्पांवर काम करण्याची संधी मिळणार आहे. NIC मधील तज्ज्ञ मार्गदर्शकांच्या देखरेखीखाली इंटर्न काम करतील, जे त्यांच्या शैक्षणिक आणि व्यावसायिक विकासाला गती देईल.

पात्रता – कोण करू शकतो अर्ज?
इंटर्नशिपसाठी अर्ज करणाऱ्या उमेदवाराने भारताचा नागरिक असावा आणि खालील शैक्षणिक पात्रता असावी:

• B.E./B.Tech (तिसरे वर्ष, लेटरल एन्ट्रीसह)
• M.E./M.Tech/M.Sc (CS/IT) – पहिले वर्ष
• MCA – दुसरे वर्ष
• ड्युअल डिग्री (M.E./M.Tech) – चौथे वर्ष
• DoEACC ‘B’ स्तराचे डिप्लोमा धारक
  शेवटच्या सेमेस्टरचे किंवा २०२५ मध्ये पदवीधर होणारे विद्यार्थी या योजनेसाठी पात्र नाहीत. तसेच, अर्जदाराचे मागील परीक्षा निकालात किमान ६०% गुण असणे आवश्यक आहे.

अर्ज कसा करावा?
अर्ज डिजिटल इंडिया इंटर्नशिप पोर्टलवर ऑनलाइन पद्धतीने करायचा आहे. प्रक्रिया पुढीलप्रमाणे:

• नोंदणी – नाव, ईमेल, मोबाईल क्रमांक आणि पासवर्डसह खाते तयार करणे.
• फॉर्म भरावा – तीन भागांत वैयक्तिक माहिती, शैक्षणिक तपशील आणि १००–२५० शब्दांत ‘Statement of Purpose’.
• कागदपत्रे अपलोड – प्रमाणपत्रे, गुणपत्रिका, CGPA ते टक्केवारीचे स्वघोषणपत्र.
• शिफारसपत्र – संस्थेच्या लेटरहेडवर असलेले अधिकृत शिफारसपत्र अपलोड करणे.
• डोमेन निवड – दोन प्राधान्यक्रम डोमेन निवडता येतील.

निवड प्रक्रिया आणि मानधन
NIC एकूण २० विद्यार्थ्यांची निवड करेल, जी त्यांच्या गुणवत्ता आणि निवडलेल्या क्षेत्रांशी सुसंगततेनुसार ठरेल. काही डोमेनसाठी वैयक्तिक किंवा स्काईपद्वारे मुलाखतीही घेतल्या जाऊ शकतात. निवड झालेल्या इंटर्नना NIC मुख्यालय नवी दिल्ली किंवा राज्य केंद्रांमध्ये नेमण्यात येईल.

लाभ आणि प्रमाणपत्र
प्रत्येक निवडलेल्या इंटर्नला दरमहा ₹१०,००० चे मानधन दिले जाईल. इंटर्नशिप पूर्ण झाल्यावर अधिकृत प्रमाणपत्र दिले जाईल. ही इंटर्नशिप विद्यार्थ्यांना सरकारी आयटी प्रणाली, डिजिटल सेवा वितरण, आणि सामाजिक हितासाठी तंत्रज्ञानाच्या वापराबद्दल मौल्यवान अनुभव देते.

आपल्या कारकिर्दीसाठी एक टप्पा पुढे
ही योजना फक्त अनुभवासाठी नव्हे, तर विद्यार्थ्यांच्या नेटवर्किंग, इनोव्हेशन स्किल्स आणि राष्ट्रीय स्तरावरील प्रकल्पात सहभाग यांसाठी एक उत्तम व्यासपीठ आहे. डिजिटल भारताचं स्वप्न साकार करताना तुमच्या ज्ञानाचा खारीचा वाटा उचलण्याची ही एक नामी संधी आहे.