भूमि अभिलेख विभागाकडून शेतसारा अथवा बिनशेती कर (एनए टॅक्स GRAS-Government Receipt Accounting System) भरण्याची सुविधा दि. १ ऑगस्ट २०२४ पासून ऑनलाइन उपलब्ध करून दिली जाणार आहे. त्यामुळे शेतसारा भरण्यासाठी आता नागरिकांना तलाठी कार्यालयात जावे लागणार नाही. शेतीकर, बिनशेती कर, शिक्षण उपकर, रोजगार हमी उपकर, ग्रामपंचायत उपकर, जिल्हा परिषद उपकर आदी करदेखील नागरिकांना या सुविधेमुळे घरबसल्या भरता येणार आहे. त्यासाठी भूमि अभिलेख विभागाने ‘एनआयसी’च्या मदतीने संगणक प्रणाली विकसित केली आहे. शेतसारा व बिनशेतीच्या जमिनींचे संगणकीकरणाचे काम पूर्ण झाले आहे. त्यापुढे रेडी रेकनर भरण्याचे काम सुरू आहे.

ऑगस्टपर्यंत हे काम पूर्ण होईल. त्यानंतर राज्यात ही सुविधा मिळणार आहे, अशी माहिती अपर जमाबंदी आयुक्त सरिता नरके यांनी दिली. इंग्रजांच्या काळापासून जमिनींवर शेतसारा कराची आकारणी केली जाते. पूर्वी शेतसारा हा महसूल देणारा महत्त्वाचा कर होता. जस जशी प्रगती होत गेली. तसे नव-नव्या करांची आकारणी सुरू झाली. मात्र, जमिनींवर आकारल्या जाणाऱ्या या कराची वसुली आजही सुरू आहे.

घरबसल्या ऑनलाइन सात-बारा उतारा मिळत असल्याने तलाठी कार्यालयात जावे लागत नाही. त्यामुळे हा कर वसूल होत नाही. त्यातून थकबाकीही वाढत जाते. न भरल्यास जमिनींच्या सात-बारा उताऱ्यावर बोजा चढविला जातो. त्यामुळे शेतसारा भरणे आवश्यक असते.