Vanarti Exam 

महाज्योती आणि वनार्टीच्या चाचणी परीक्षेत तांत्रिक अडथळ्यांमुळे विद्यार्थ्यांना मोठा फटका बसला! महात्मा ज्योतिबा फुले संवर्धन व प्रशिक्षण संस्था (महाज्योती) आणि वसंतराव नाईक संशोधन व प्रशिक्षण संस्था (वनार्टी) यांच्यामार्फत बुधवार, ७ ऑक्टोबर रोजी घेण्यात आलेल्या चाचणी परीक्षेदरम्यान काही परीक्षा केंद्रांवर तांत्रिक अडचणी निर्माण झाल्या. त्यामुळे विद्यार्थ्यांना परीक्षेला सामोरे जाताना अडचणींचा सामना करावा लागला. विद्यार्थ्यांच्या अडचणींची दखल घेत दोन्ही संस्थांनी आता १० ऑक्टोबर रोजी फेरपरीक्षा घेण्याचा निर्णय घेतला आहे.

तब्बल ९० हजारांहून अधिक विद्यार्थ्यांच्या चाचणी परीक्षेत तांत्रिक अडचणींमुळे गोंधळ निर्माण झाला असून, आता संपूर्ण प्रकरणाची चौकशी होणार आहे. यूपीएससी, एमपीएससी, अभियांत्रिकी सेवा, संयुक्त गट-ब व गट-क परीक्षा तसेच लष्करातील सैनिक भरतीपूर्व प्रशिक्षणासाठी विद्यार्थ्यांची निवड करण्यासाठी ही चाचणी परीक्षा घेण्यात आली होती. राज्यभरातून सुमारे ९० हजार ६०० विद्यार्थ्यांनी अर्ज केले होते. त्यानुसार राज्यातील ३२ शहरांमधील ६४ परीक्षा केंद्रांवर परीक्षा आयोजित करण्यात आली होती.

मात्र, बुधवारी पुण्यातील समता ब्राइट इंग्लिश मीडियम स्कूल या परीक्षा केंद्रावर काही विद्यार्थ्यांना तांत्रिक अडचणींचा सामना करावा लागला. या प्रकाराची गंभीर दखल घेत संपूर्ण प्रकरणाची चौकशी करण्यात येणार असल्याचे इतर मागासवर्ग व बहुजन कल्याण विभागाने स्पष्ट केले आहे. यासाठी केंद्रनिरीक्षक, संबंधित सहाय्यक संचालक तसेच परीक्षा घेणाऱ्या एजन्सीकडून घटनेचा सविस्तर अहवाल मागविण्यात आला आहे. तसेच परीक्षा केंद्रावरील सीसीटीव्ही फुटेज, उपलब्ध तांत्रिक नोंदी आणि संपूर्ण परीक्षा प्रक्रियेची पडताळणी केली जाणार आहे. या प्रकरणात कोणाचीही भूमिका किंवा हलगर्जीपणा आढळल्यास नियमानुसार कठोर कारवाई करण्याचा इशाराही विभागाने दिला आहे.

Vanarti Exam Center :महाज्योती आणि वनार्टी संस्थेमार्फत २०२६-२७ या आर्थिक वर्षात विविध स्पर्धा परीक्षांच्या पूर्वतयारीसाठी प्रशिक्षणाची संधी उपलब्ध करून देण्यात येणार आहे. या प्रशिक्षणासाठी विद्यार्थ्यांची निवड करण्याकरिता घेण्यात येणारी चाळणी परीक्षा ७ ऑक्टोबर ते ९ ऑक्टोबर २०२६ या कालावधीत नियोजित करण्यात आली आहे.या चाळणी परीक्षेद्वारे संघ लोकसेवा आयोग (नागरी सेवा), महाराष्ट्र लोकसेवा आयोगाच्या राज्यसेवा, अभियांत्रिकी सेवा, संयुक्त गट-ब व गट-क तसेच लष्करातील सैनिक भरती परीक्षेपूर्व प्रशिक्षणासाठी विद्यार्थ्यांची निवड केली जाणार आहे. त्यामुळे संबंधित परीक्षांची तयारी करणाऱ्या विद्यार्थ्यांसाठी ही महत्त्वाची संधी मानली जात आहे.

महाज्योती व वनार्टीच्या चाळणी परीक्षेसाठी अर्ज केलेल्या विद्यार्थ्यांसाठी महत्त्वाची दिलासादायक अपडेट समोर आली आहे. ७ ते ९ ऑक्टोबर २०२६ दरम्यान होणाऱ्या चाळणी परीक्षेसाठी विद्यार्थ्यांच्या मागणीनुसार दिल्ली येथील परीक्षा केंद्र उपलब्ध करून देण्यात आले होते. मात्र, सध्या दिल्ली येथे जाऊन परीक्षा देणे शक्य नसलेल्या विद्यार्थ्यांची अडचण लक्षात घेऊन त्यांना आता महाराष्ट्रातच परीक्षा केंद्र उपलब्ध करून देण्यात येणार आहे.दिल्ली परीक्षा केंद्राची मागणी करणाऱ्या विद्यार्थ्यांकडून यापूर्वी अर्ज मागविण्यात आले होते. त्यानुसार संबंधित विद्यार्थ्यांना दिल्ली केंद्र देण्यात आले. मात्र, ज्या विद्यार्थ्यांना दिल्ली केंद्र मिळाले आहे आणि सद्यस्थितीत तेथून परीक्षा देणे शक्य नाही, अशा सर्व विद्यार्थ्यांना महाराष्ट्रातील परीक्षा केंद्रावर परीक्षा देण्याची सुविधा उपलब्ध करून देण्यात येत आहे.

विद्यार्थ्यांच्या मागणीनुसार परीक्षा केंद्रात पुन्हा बदलाची सुविधा; महाराष्ट्राऐवजी दिल्ली केंद्राचीही संधी. महाज्योती व वनार्टीच्या चाळणी परीक्षेसाठी विद्यार्थ्यांना परीक्षा केंद्राबाबत मोठा दिलासा देण्यात आला आहे. विद्यार्थ्यांच्या मागणीचा विचार करून, ज्या विद्यार्थ्यांना सध्या महाराष्ट्रातील परीक्षा केंद्र उपलब्ध करून देण्यात आले आहे आणि आता दिल्ली येथून चाळणी परीक्षा देण्याची इच्छा आहे, अशा विद्यार्थ्यांसाठी पुन्हा दिल्ली येथील परीक्षा केंद्र उपलब्ध करून देण्यात येत आहे.त्यामुळे विद्यार्थ्यांना त्यांच्या सोयी आणि मागणीनुसार महाराष्ट्र किंवा दिल्ली येथून चाळणी परीक्षा देण्याची सुविधा मिळणार आहे.