ठाणे आणि आसपासच्या महानगर परिसरातील घरांसाठी अर्जदारांचा उत्साह वाढत असून, शुक्रवार, शनिवार आणि रविवारी अर्ज विक्रीत मोठी वाढ झाली. सोमवारी सकाळी ११.१५ वाजेपर्यंत ६४,४९१ अर्ज दाखल झाले होते, त्यापैकी ३८,६७८ अर्जदारांनी अनामत रक्कम भरून निश्चित अर्ज सादर केले होते. सायंकाळपर्यंत ही संख्या वाढून ६७,५३९ झाली, तर निश्चित अर्जांची संख्या ४०,९९८ वर पोहोचली.

१४ जुलैपासून सुरू झालेल्या या प्रक्रियेत म्हाडा कोकण मंडळाने परवडणाऱ्या घरांपासून उच्च प्रवर्गातील घरांपर्यंत पर्याय उपलब्ध करून दिले आहेत. पालघर, कल्याणसह काही प्रकल्पांमध्ये १० लाखांपेक्षा कमी किमतीत घरे देण्यात येत असून, किंमत ९.५५ लाखांपासून ८४ लाखांपर्यंत आहे. यामध्ये २० टक्के सर्वसमावेशक योजनेची घरेही आहेत, ज्यांची किंमत बाजारभावापेक्षा कमी आहे.

सोडतीसाठीची घरे ठाणे, डोंबिवली, टिटवाळा, कल्याण, नांदिवली, सानपाडा, दिघा, घणसोली, ओवळे, डायघर, विरार, मीरा रोड, कावेसर, बाळकुम, शिरढोण, गोठेघर, चितळसर, मानपाडा आणि पालघर येथे आहेत. सोडत ३ सप्टेंबर रोजी काढण्यात येणार असून, वाढत्या मागणीमुळे अर्जाची मुदत वाढण्याची शक्यता व्यक्त केली जात आहे.