राज्यातील सार्वजनिक आरोग्य व्यवस्था अधिक सक्षम करण्यासाठी महाराष्ट्र सरकारने मोठा निर्णय घेतला आहे. राज्यातील विविध आरोग्य केंद्रे आणि रुग्णालयांमध्ये २,०७० नवीन पदे निर्माण करण्यास मान्यता देण्यात आली आहे (Health Department 2000 vacancies), अशी माहिती सार्वजनिक आरोग्यमंत्री प्रकाश आबिटकर यांनी दिली. या निर्णयामुळे राज्यातील प्राथमिक आरोग्य केंद्रे, ग्रामीण रुग्णालये आणि जिल्हा रुग्णालयांना मोठा आधार मिळणार आहे.

शासनाने पदनिर्मितीस दिली मान्यता
१३ फेब्रुवारी २०२५ रोजी सार्वजनिक आरोग्य विभागाने एक शासन निर्णय (GR) जारी करून नव्याने स्थापन आणि श्रेणीवर्धित आरोग्य केंद्रांमध्ये आवश्यक पदनिर्मितीस मंजुरी दिली आहे. राज्यातील उपकेंद्र, प्राथमिक आरोग्य केंद्र, ग्रामीण रुग्णालय, उपजिल्हा रुग्णालय, जिल्हा रुग्णालय आणि ट्रॉमा केअर सेंटर यांसाठी ही पदे मंजूर करण्यात आली आहेत.

८६ नवीन आरोग्य केंद्रांना मनुष्यबळ उपलब्ध होणार
ज्या आरोग्य केंद्रांचे ७५ टक्के बांधकाम पूर्ण झाले आहे, अशा ८६ आरोग्य संस्थांमध्ये ही भरती होणार आहे. यामध्ये ८३७ नियमित पदे आणि १,२३३ कुशल/अकुशल कर्मचाऱ्यांची भरती बाह्य यंत्रणेद्वारे केली जाणार आहे. या अंतर्गत खालील आरोग्य संस्थांचा समावेश आहे –

•  ४७ उपकेंद्रे
• १६ प्राथमिक आरोग्य केंद्रे
• ५ ग्रामीण रुग्णालये
• २ ट्रॉमा केअर युनिट्स
• ४ स्त्री रुग्णालये
• १० उपजिल्हा रुग्णालये
• २ जिल्हा रुग्णालये

राज्यातील आरोग्य व्यवस्थेचा पाया मजबूत होणार
ही पदनिर्मिती राज्याच्या संपूर्ण आरोग्य व्यवस्थेला बळकट करण्याच्या उद्देशाने करण्यात आली आहे. सरकारने रिक्त जागा टप्प्याटप्प्याने भरण्याचा निर्णय घेतला असून लवकरच या पदांसाठी भरती प्रक्रिया सुरू केली जाणार आहे. त्यामुळे राज्यातील नागरिकांना अधिक चांगल्या आणि तत्पर आरोग्य सेवा मिळण्यास मदत होईल.

गट अ आणि गट ब वैद्यकीय अधिकाऱ्यांना संधी
सार्वजनिक आरोग्य विभागात यापूर्वी झालेल्या गट अ (MBBS) वैद्यकीय अधिकाऱ्यांच्या प्रतीक्षा यादीतील ४०८ उमेदवारांना आणि गट ब (BAMS) वैद्यकीय अधिकाऱ्यांच्या प्रतीक्षा यादीतील २५ उमेदवारांना शासकीय सेवेत सामावून घेण्याचा निर्णय घेण्यात आला आहे. आरोग्यमंत्री प्रकाश आबिटकर यांनी यासंदर्भात निर्देश दिले असून लवकरच त्यांची नियुक्ती होणार आहे.

राज्यातील आरोग्य सेवा अधिक सक्षम होणार
राज्यभरातील विविध आरोग्य संस्थांमध्ये भरती होत असल्यामुळे ग्रामीण आणि शहरी भागातील आरोग्यसेवा अधिक सक्षम होईल. तसेच, भविष्यात आणखी पदे निर्माण करण्यासाठी आणि रिक्त जागा भरण्यासाठी सरकार प्रयत्नशील आहे. या मेगाभरतीमुळे राज्यातील हजारो तरुणांना सरकारी नोकरीची संधी उपलब्ध होणार आहे.