सिडकोमध्ये सुरू असलेल्या क्षेत्र अधिकारी आणि सहाय्यक विकास अधिकारी (सामान्य) संवर्गातील २४ पदांच्या सरळ भरती प्रक्रियेला सिडको कर्मचारी संघटनेने उघड विरोध केला आहे. संघटनेच्या मते, ही भरती प्रक्रिया सिडकोतील विद्यमान कर्मचारी आणि प्रकल्पग्रस्त महिलांच्या पदोन्नतीच्या संधी हिरावणारी आहे.

संघटनेच्या शिष्टमंडळाने यासंदर्भात पनवेलचे आमदार प्रशांत ठाकूर यांची भेट घेतली असून, याआधी त्यांनी थेट उपमुख्यमंत्री एकनाथ शिंदे यांनाही निवेदन दिले आहे. संघटनेचे अध्यक्ष नरेंद्र हिरे आणि सरचिटणीस नितीन कांबळे यांच्या म्हणण्यानुसार, नियमाप्रमाणे रिक्त पदांपैकी ८०% पदे पदोन्नतीद्वारे आणि केवळ २०% पदे सरळ भरतीने भरली जावी, अशी तरतूद आहे. मात्र, सिडको प्रशासनाने यावेळी जाहिरात प्रसिद्ध करताना सहाय्यक विकास अधिकारी पदासाठी आवश्यक शैक्षणिक अर्हता बदलली असून, त्यामुळे नियमबाह्य भरतीचा आरोप संघटनेने लावला आहे.

ही भरती थांबवून प्रथम विद्यमान कर्मचाऱ्यांना व स्थानिक प्रकल्पग्रस्त महिलांना न्याय द्यावा, अशी मागणी संघटनेने लावून धरली आहे. या मुद्द्यावर आता सिडको प्रशासन काय भूमिका घेते, याकडे सर्वांचे लक्ष लागले आहे.