पुणे विद्यापीठ परीक्षा: हॉलतिकीट उपलब्ध; मॉक टेस्टही होणार

Pune University Admit Card : पुणे विद्यापीठ पदवी, पदव्युत्तर अभ्यासक्रमांच्या अंतिम वर्षाच्या परीक्षांसाठी सज्ज झाले आहे.

Pune University Admit Card : सावित्रीबाई फुले पुणे विद्यापीठाने पदवी, पदव्युत्तर अभ्यासक्रमांच्या अंतिम वर्षाच्या परीक्षा सुरळीत पार पाडण्यासाठी जोरदार तयारी केली असून, साधारण अडीच लाख विद्यार्थ्यांच्या ‘प्रोफाइल’मध्ये हॉलतिकीट उपलब्ध करून दिले आहे. त्याचप्रमाणे एमसीक्यू परीक्षा पद्धतीची विद्यार्थ्यांना माहिती व्हावी, यासाठी दोन सराव परीक्षांचे आयोजन करण्यात आले आहे.

विद्यापीठाकडून अंतिम वर्षाची परीक्षा एमसीक्यू (बहुपर्यायी स्वरूपाची), एक तास वेळाची आणि ५० गुणांची घेतली जाणार आहे. बहुपर्यायी प्रश्नपत्रिका तयार करण्यासाठी विद्यापीठाकडून समिती नेमण्यात आली आहे. प्रत्येक विषयाचे प्रश्नसंच तयार करण्यात येणार आहेत. त्यातील ६० प्रश्न प्रत्यक्ष परीक्षेत विचारले जातील. विद्यार्थ्यांना एमसीक्यू परीक्षा पद्धतीचा अंदाज येण्यासाठी सराव चाचणी दिली जाणार आहे. साधारण परीक्षेच्या आठवडाभरापूर्वी ही चाचणी होईल. दरम्यान, सर्व विद्यार्थ्यांना त्यांच्या प्रोफाइलमध्ये दिलेले हॉलतिकीट डाउनलोड करता येईल, अशी माहिती विद्यापीठ प्रशासनाने दिली.

‘अंतिम वर्षाच्या ऑनलाइन पद्धतीच्या परीक्षांसाठी अतिशय सोपी आणि सुरक्षित पद्धत आहे. परीक्षा देणाऱ्या विद्यार्थ्यांच्या मोबाइलवर ओटीपी येईल. हा ओटीपी व हॉलतिकीटच्या साह्याने विद्यार्थ्यांना परीक्षा देता येईल,’ असे परीक्षा व मूल्यमापन मंडळाचे संचालक डॉ. महेश काकडे यांनी सांगितले.

‘सराव चाचणी घेण्यात येणार’

सावित्रीबाई फुले पुणे विद्यापीठाच्या विद्यार्थ्यांना अंतिम वर्षांच्या परीक्षा देतांना कोणताही त्रास होणार नाही, याची काळजी परीक्षा व मूल्यमापन मंडळाने घेतली आहे. विद्यार्थ्यांना एमसीक्यू परीक्षा पद्धतीचा अंदाज येण्यासाठी सराव चाचणी घेण्यात येईल. विद्यार्थ्यांनी कोणताही मानसिक तणाव न घेता परीक्षा द्यावी.

सोर्स : म. टा.