राज्यातील पोलिस भरतीची तयारी करणाऱ्या उमेदवारांनी पोलिस शिपाई भरतीमधील सर्वसाधारण प्रवर्गाची वयोमर्यादा पाच वर्षांनी वाढवून ३८ वर्षे करण्यात यावी, अशी मागणी केली आहे. यासंदर्भात पोलिस मित्र अभ्यासिका, बाभूळगाव यांच्या वतीने मुख्य प्रतोद तथा अकोला पूर्वचे आमदार रणधीर सावरकर यांना निवेदन देण्यात आले. निवेदनात नमूद करण्यात आले आहे की, राज्यातील अनेक युवक गेल्या अनेक वर्षापासून पोलिस भरतीची तयारी करीत आहेत. मात्र, भरती प्रक्रियेत होणारा विलंब, न्यायालयीन प्रक्रिया तसेच इतर प्रशासकीय कारणांमुळे अनेक उमेदवार वयोमर्यादेबाहेर जात आहेत. इतर राज्यांमध्ये पोलिस भरतीसाठी अधिक वयोमर्यादा निश्चित करण्यात आली आहे. मध्य प्रदेश व गुजरातमध्ये ३८ वर्षे, तर आसाममध्ये ४० वर्षापर्यंत उमेदवारांना संधी दिली जाते. त्याच धर्तीवर महाराष्ट्र शासनानेही सर्वसाधारण प्रवर्गासाठी वयोमर्यादा वाढवून उमेदवारांना दिलासा द्यावा, अशी मागणी निवेदनाद्वारे करण्यात आली. निवेदन देताना परिसरातील तसेच अकोला येथील अनेक युवक उपस्थित होते.

दरम्यान मागील वर्षी राज्य सरकारने घोषणा करूनही पोलिस भरती झाली नव्हती. त्यामुळे राज्यातील 30 ते 40 हजार विद्यार्थी हे आता होणाऱ्या भरतीत वयोमर्यादातून बाद होणार आहेत. त्यांना ही वयोमर्यादा वाढवून देण्याची मागणी संभाजी ब्रिगेड विद्यार्थी संघटनेद्वारे निवेदनाच्या माध्यमातून करण्यात आली आहे.