मुख्यमंत्री लाडकी बहीण योजनेच्या लाभार्थींच्या घरी कार आहे का नाही, याची तपासणी लवकरच जिल्ह्यात सुरू होणार आहे. महिला व बालकल्याण विभागाने आरटीओकडून मिळालेली माहिती अंगणवाडी सेविकांना दिली असून, त्यांनी सव्वातीन हजार लाभार्थींची तपासणी करावी, असे निर्देश देण्यात आले आहेत. कुटुंबातील एखाद्या व्यक्तीकडे कार असल्यास संबंधित महिलांना योजनेतून वगळले जाणार आहे.

निवडणुकीच्या पार्श्वभूमीवर सुरू करण्यात आलेल्या या योजनेसाठी अर्ज करताना महिलांकडून हमीपत्र घेण्यात आले होते, ज्यात कुटुंबात चारचाकी नसल्याची अट होती. मात्र, पडताळणी न करता लाभ देण्यात आला. सरकारने लाभार्थींना स्वयंप्रेरणेने लाभ सोडण्याचे आवाहन केले होते, पण प्रतिसाद मिळाला नाही. त्यामुळे आता प्रत्यक्ष घरोघरी तपासणी केली जाणार असून, नियमभंग आढळल्यास लाभ रद्द केला जाईल.

विभक्त राहणाऱ्या महिलांना लाभ मिळणार
सासरे, दीर किंवा इतर नातेवाईकांच्या नावावर कार असूनही संबंधित महिला आपल्या पती व मुलांसह स्वतंत्र राहत असल्यास त्यांना योजनेचा लाभ मिळत राहील, असे महिला व बालविकास विभागाने स्पष्ट केले आहे.

सव्वातीन हजार लाभार्थींची तपासणी
महिला व बालकल्याण विभागाने परिवहन विभागाकडून चारचाकी वाहनधारकांची यादी मिळवली आहे. या आधारे अंगणवाडी सेविका घरोघरी जाऊन तपासणी करतील. महिलांच्या नावावर कार असल्यास त्यांची नावे यादीतून वगळली जाणार आहेत.

तालुकानिहाय तपासणीसाठी आलेले अर्ज

• आर्वी: ३३३
• आष्टी (श): १३९
• कारंजा (घा): ११७
• देवळी: २४६
• वर्धा: १००४
• समुद्रपूर: ४२२
• सेलू: २८७
• हिंगणघाट: ६७४

५ एकर शेती व शासकीय नोकरी नको; उत्पन्न मर्यादा अडीच लाख
योजनेसाठी अल्पभूधारक शेतकरी, शासकीय नोकरी नसलेले व वार्षिक उत्पन्न अडीच लाखांपेक्षा कमी असलेले अर्जदार पात्र ठरवले होते. आता पडताळणीअंती निकष पूर्ण न करणाऱ्या लाभार्थ्यांना वगळले जाणार आहे.