IIT Online Placement Process Started : IIT Online Placement Process Started , Offers of Billions Package – आयआयटींमधील ऑनलाइन प्लेसमेंटमध्ये कोणत्या कंपनीची किती पगाराची ऑफर…जाणून घ्या.

देशभरातील आयआयटींमध्ये सोमवारपासून ऑनलाइन प्लेसमेंट सुरू झाल्या. आयआयटी मुंबईत प्री प्लेसमेंट ऑफर्स (IIT online placement) स्वीकारणाऱ्या विद्यार्थ्यांचे प्रमाण गेल्या वर्षीच्या तुलनेत जास्त असल्याचे संस्थेने सांगितले आहे. यंदा ऑप्टिव्हर या कंपनीने तब्बल एक कोटी ४० लाख रुपयांचे पॅकेज देऊ केले आहे. आयआयटी मद्रास, आयआयटी मंडी येथेही मोठ्या प्रमाणावर विद्यार्थ्यांना नोकऱ्या मिळाल्या आहेत.

आयआयटीमध्ये या वर्षीचा पहिला प्लेसमेंट हंगाम सुरू झाला आहे. आयआयटी मुंबईत पहिल्या दिवशीच्या पहिल्या सत्रात १८ कंपन्या सहभागी झाल्या होत्या. यात मायक्रोसॉफ्ट, गुगल, टेक्सास इन्स्ट्रुमेंट्स, क्वालकॉम, बोस्टन कन्सल्टिंग ग्रुप, अॅपल आदींचा समावेश होता. पहिल्या सत्रात ऑप्टिव्हर या कंपनीने आंतरराष्ट्रीय ऑफर देऊ केली आहे. तर, यंदा १५३ विद्यार्थ्यांनी प्लेसमेंटपूर्व ऑफर्स स्वीकारल्या आहेत, असे संस्थेने स्पष्ट केले. करोनाच्या पार्श्वभूमीवर यंदा प्लेसमेंटवर परिणाम होईल, असा अंदाज व्यक्त करण्यात येत होता. मात्र तरीही खूप चांगला प्रतिसाद मिळाला आहे.

सर्वाधिक नोकऱ्या या आयटी, सॉफ्टवेअर, कोअर इंजिनीअरिंग आणि कन्सल्टिंग या क्षेत्रात मिळाल्याचे आयआयटी मुंबईने स्पष्ट केले आहे. क्वालकॉम या कंपनीने ४६.४१ लाखांचे, वर्ल्डक्वाण्ट कंपनीने ३९.७० लाख, मॉर्गन स्टेन्ली या कंपनीने ३७.२५ लाख, तर उबरने ३५.३८ लाख इतके वार्षिक पॅकेज देऊ केले आहेत. आयआयटी मद्रासमध्ये पहिल्या दिवशीच्या पहिल्या सत्रात १२३ विद्यार्थ्यांना ऑफर्स मिळाल्या आहेत. यामध्ये मायक्रोसॉफ्ट, बजाज ऑटो, इस्रो या कंपन्यांचा समावेश होता. येथे मायक्रोसॉफ्टने सर्वाधिक १९, तर इस्रोने १० ऑफर्स दिल्या आहेत. आयआयटी मद्रासमध्ये यंदा सुमारे २५६ कंपन्यांनी नोंदणी केली असून यात ७१ स्टार्टअप्सचा समावेश आहे.

सोर्स : म. टा.