Hospicio Hospital Goa Recruitment 2025

दक्षिण गोव्यातील हॉस्पिसिओ इस्पितळात सध्या तब्बल १८७ पदे रिक्त असून, यामुळे मनुष्यबळाची कमतरता भासते आहे. इस्पितळातील एकूण ६४४ पदांपैकी ४५७ पदे भरली असून, कंत्राटी पद्धतीवर १९६ जणांची नियुक्ती करण्यात आली आहे. मात्र, मल्टीटास्किंग कर्मचाऱ्यांच्या १७५ पदांपैकी अजूनही ७३ पदे रिक्त असल्याची माहिती आरोग्यमंत्री विश्वजित राणे यांनी विधानसभेत लेखी उत्तराद्वारे दिली.

या इस्पितळात थेट येणाऱ्या रुग्णांसोबतच दक्षिण गोव्यातील विविध आरोग्य केंद्रांतून पाठवलेले रुग्णही दाखल होतात. खाटा अपुऱ्या असल्या तरी कोणत्याही रुग्णाला उपचार नाकारले जात नाहीत, असे वैद्यकीय अधिकाऱ्यांचे म्हणणे आहे. मात्र, खाटांची संख्या वाढवली तर आधीच कामाच्या ताणाखाली असलेल्या कर्मचाऱ्यांवर अधिक भार पडेल, त्यामुळे अतिरिक्त मनुष्यबळाची तातडीची गरज निर्माण झाली आहे.

दक्षिण गोवा जिल्हा इस्पितळातून २०२१ ते २०२५ दरम्यान हजारो रुग्णांना गोमेकॉ आणि बांबोळी येथे उपचारासाठी पाठवण्यात आले. २०२१ मध्ये ३७१७ रुग्णांपैकी ३ जण, २०२२ मध्ये ३८८५ पैकी १० जण, २०२३ मध्ये ४४४२ पैकी २ जण, २०२४ मध्ये ४७३९ पैकी ३ जण तर २०२५ मध्ये जूनपर्यंत २२०९ रुग्णांपैकी काहींचा मृत्यू झाला आहे.