मारेगाव तालुक्यातील बोटोणी या आदिवासी पेसा गावात जनकल्याण समीती द्वारा ग्रामीण रुग्णालय उघडण्यात आले आहे. येथीलच पांडे यांच्या निवासस्थानी भाडेतत्वावर सुरु करण्यात आलेल्या या ग्रामीण रुग्णालयातील पदभरतीची जाहिरात करण्यात आली होती. विविध पदे भरण्या बाबत काही वृत्तपत्रातुन झळकलेल्या जाहीराती वरुन मोठ्या संख्येने इच्छुकांनी मुलाखती दिल्या होत्या. मात्र प्रदिर्घ कालावधी नंतरही रिझल्ट(Maregaon Rural Hospital Walk In Result)  लागलेला नाही. त्यामुळे हा रिझल्ट कधी लागेल? या बाबत उत्सुकता लागलेली आहे. मारेगाव तालुक्यात सुशिक्षीत बेरोजगारांची संख्या मोठ्या प्रमाणात आहे. त्यामुळे पहिल्यांदाच एवढ्या मोठ्या प्रमाणात बोटोणीत पदभरती होणार या अपेक्षेने मुलाखतीसाठी बेरोजगारांनी प्रचंड गर्दी केली होती.

मात्र अजुनही बेरोजगार बांधवांच्या हाती नियुक्तीचे आदेश पोहचलेले नाही. त्यामुळे उलटसुलट चर्चेला उधाण आले आहे. जणकल्याण समीतीच्या संस्थाध्यक्षा कडुन हे रुग्णालय संस्थेच्या स्वनिधीतुन तथा देणगीतुन सुरु केल्याची माहीती स्थानिक ग्रामपंचायतीला दिली असली तरी मात्र वृत्तपत्रा मधुन हे रुग्णालय शासनमान्य तथा अनुदानीत असल्याचे जाहीर करण्यात आले आहे.त्यामुळे संस्थाध्यक्षांनी दिलेली माहीती नेमकी खरी कोणती?याबाबत बोटोणी गावात तर्क वितर्क सुरु आहे. तसेच सुरु झालेल्या रुग्णालया मधील  कार्यरत कर्मचारी विना वेतन सेवाभावी वृत्तीने काम करीत असुन शासकीय अनुदान प्राप्त होत नाही तो पर्यत दररोज काम करीत असल्याची माहीती संस्थाध्यक्षांनी ग्रामपंचायतीला दिली आहे.

मात्र विना वेतन काम करणारे कर्मचारी उपलब्ध असतांना संस्थाध्यक्षांना वृत्तपत्रातुन नविन पदभरतीची आवश्यकता का वाटावी? असा प्रश्न बेरोजगार बांधवां मध्ये चर्चिला जात असुन नेमकी भानगड आहे तरी काय? याबाबत संस्थेच्या वतीने कोणीही ब्र काढायला तयार नाही. त्यामुळे आपली फसवणूक होणार तर नाही ना! अशी शंका आता अनेका मधुन व्यक्त होत आहे.