Divyang Pension Yojana

Divyang Pension Yojana -दिव्यांग व्यक्तींना पेन्शनचा लाभ मिळण्याचा मार्ग अधिक सुलभ करण्यासाठी केंद्र सरकारने महत्त्वाचे बदल केले आहेत. दिव्यांगत्वाची पात्रता मर्यादा ८० टक्क्यांवरून ४० टक्क्यांपर्यंत कमी करण्यात आली असून, संबंधित प्रवर्गातील समान योजनांच्या तुलनेत दिव्यांगांना २५ टक्के अधिक आर्थिक मदत देण्याची तरतूद करण्यात आली आहे. नव्या नियमांनुसार, जन्मापासून दिव्यांग असलेल्या व्यक्तींनाही या पेन्शन योजनेचा लाभ मिळू शकणार आहे. सहायक अनुदानांतर्गत ० ते ७९ वर्षे वयोगटातील पात्र लाभार्थ्यांना दरमहा ३७५ रुपये, तर ८० वर्षे किंवा त्याहून अधिक वयाच्या लाभार्थ्यांना दरमहा ६२५ रुपये दिले जाणार आहेत. त्यामुळे यापूर्वी पात्रतेच्या निकषांमुळे योजनेच्या लाभापासून वंचित राहिलेल्या अनेक दिव्यांग व्यक्तींना दिलासा मिळण्याची शक्यता आहे.

देशातील कोट्यवधी गरजू नागरिकांना सामाजिक सुरक्षा आणि आर्थिक आधार देण्यासाठी केंद्र सरकारने महत्त्वाचा निर्णय घेतला आहे. पंतप्रधान नरेंद्र मोदी यांच्या अध्यक्षतेखाली झालेल्या केंद्रीय मंत्रिमंडळाच्या बैठकीत राष्ट्रीय सामाजिक साहाय्यता कार्यक्रम (NSAP) पुढील पाच वर्षे सुरू ठेवण्यास मंजुरी देण्यात आली. या कार्यक्रमासाठी तब्बल ५३,४२८ कोटी रुपयांचा खर्च करण्यात येणार आहे.या कार्यक्रमांतर्गत वृद्धापकाळ पेन्शन, विधवा पेन्शन आणि दिव्यांग पेन्शन यांसह सामाजिक मदतीशी संबंधित विविध योजना राबवल्या जातात. केंद्र सरकारच्या या निर्णयामुळे देशातील ३६ राज्ये आणि केंद्रशासित प्रदेशांमधील सुमारे ३.२० कोटी लाभार्थ्यांना लाभ मिळू शकणार आहे. त्यामुळे आर्थिकदृष्ट्या दुर्बल आणि गरजू घटकांना सामाजिक सुरक्षा देण्याच्या प्रयत्नांना बळ मिळणार आहे.