Degree College Admission Higher Education Department Approves Recognition of 47 New Colleges : नव्या ४७ कॉलेजांना उच्च व तंत्रशिक्षण विभागाने मान्यता दिली आहे…

उच्च व तंत्रशिक्षण विभागाने शैक्षणिक वर्ष २०२०-२१साठी राज्यातील अकृषी विद्यापीठातील ४७ कॉलेजांना अंतिम मान्यता दिली आहे. यामुळे पदवी प्रथम वर्षाच्या अभ्यासक्रमाच्या जागा वाढणार आहे. कला, वाणिज्य, विज्ञान शाखांच्या पारंपरिक अभ्यासक्रमासह काही व्यावसायिक शाखेत प्रवेश घेणाऱ्या विद्यार्थांना दिलासा मिळणार आहे.

विद्यापीठ कायद्यानुसार नवीन कॉलेज सुरू करण्यासाठी विद्यापीठे संस्थांकडून प्रस्ताव मागवतात. या प्रस्तावांची छाननी झाल्यानंतर कॉलेजे सुरू करण्यास सरकारकडून मान्यता देण्यात येते. त्यानुसार यंदा उच्च व तंत्रशिक्षण विभागाने दोन टप्प्यांमध्ये नवीन ४७ कॉलेजांना अंतिम मान्यता दिली आहे. याबाबतचा शासन निर्णय प्रसिद्ध करण्यात आला आहे. मान्यता दिलेल्या कॉलेजांमध्ये सर्वाधिक कॉलेजे ही मुंबई विद्यापीठाशी संलग्न आहेत. मुंबई विद्यापीठाशी संलग्न असणारी ३५ कॉलेजे असून त्याखालोखाल संत गाडगेबाबा अमरावती विद्यापीठ अमरावतीशी संलग्न ९ कॉलेजांना मान्यता मिळाली आहे. यामध्ये एका महिला कॉलेजाचाही समावेश आहे.

एसएनडीटी महिला विद्यापीठाच्या तीन कॉलेजांना मान्यता मिळाली आहे. शिवाजी विद्यापीठ -कोल्हापूरमध्ये दोन, सावित्रीबाई फुले पुणे विद्यापीठ- पुणे येथे तीन, स्वामी रामानंद तीर्थ मराठवाडा विद्यापीठ- नांदेड एक आणि गोंडवाना विद्यापीठ गडचिरोली येथील दोन कॉलेजांना मान्यता देण्यात आली आहे. या कॉलेजांना कायम विनाअनुदानित तत्त्वावर मान्यता दिली आहे. कॉलेजांना भविष्यात कधीही अनुदान न मागण्याचे प्रतिज्ञापत्र दिल्यानंतर संलग्नता देण्याचे आदेश देण्यात आले आहेत.

सोर्स : म. टा.