मुंबई महापालिकेतील कामगार, कर्मचाऱ्यांचे अनेक प्रश्न प्रलंबित असून यात महापालिकेतील विविध खात्यांतील 52 हजार 221 रिक्त पदांची भरती हा मोठा गंभीर विषय आहे. ही रिक्त पदे तातडीने भरा आणि याबाबत पालिका प्रशासनाने संयुक्त बैठक बोलवावी, अशी मागणी म्युनिसिपल कर्मचारी कामगार सेनेने पालिका पालिका आयुक्तांकडे केली आहे. मुंबई महापालिकेने सादर केलेल्या अर्थसंकल्पात सुमारे दोन लाखांपेक्षा जास्त विकासकामांची घोषणा केली आहे, मात्र कर्मचारी, कामगारांसाठी असलेल्या योजना तसेच त्यासंदर्भात कोणतीही मोठी तरतूद करण्यात आलेली नाही. त्यामुळे विकासकामांकडे लक्ष जरूर द्या, पण विकासकामांची अंमलबजावणी करणाऱ्या कर्मचारी, कामगारांना वाऱ्यावर सोडू नका, अशी मागणी म्युनिसिपल कर्मचारी कामगार सेनेने पालिका आयुक्त भूषण गगराणी यांच्याकडे म्युनिसिपल कर्मचारी कामगार सेनेचे अध्यक्ष बाबा कदम आणि उपाध्यक्ष संजय कांबळे-बापेरकर यांनी केली आहे.

जुनी पेन्शन योजना (ओपीएस) लागू करा, गटविमा योजना सर्व कर्मचारी आणि अधिकारी यांना समान पद्धतीने लागू करा, कर्मचाऱ्यांना देण्यात येणारी भत्तेवाढ ही 2016 पासून लागू करा, घाणीशी संबंधित काम करणाऱ्या कर्मचाऱ्यांना ‘सफाई कामगार’ घोषित करून त्यांना लाड-पागे समितीच्या शिफारशी लागू करा, अशा मागण्या म्युनिसिपल कर्मचारी कामगार सेनेने केल्या आहेत.