सागरी किनारपट्टीची व सागराची इत्यंभूत माहिती असलेल्या मच्छिमारांच्या मुलांना आता तटरक्षक दल संधी देऊ इच्छित आहे. त्यासाठी विशेष भरती प्रक्रिया राबवली जाईल, असे दलाकडून सोमवारी वरळी भागातील विशेष मेळाव्यात सांगण्यात आले. सागरी सुरक्षेसंबंधी तटरक्षक दलाने वरळी किनारपट्टीवर मच्छिमारांशी संवाद साधला.

२६/११ च्या हल्ल्यानंतर किनारपट्टी सुरक्षेसाठी तटरक्षक दलाकडून विविध कार्यक्रम राबविले जातात. मच्छिमार बांधवांशी चर्चा, हा त्यातील सर्वात मोठा व महत्त्वाचा कार्यक्रम आहे. याअंतर्गत मच्छिमारांमध्ये समुद्री घुसखोरी, बाहेरील नौका ओळखणे, संशयास्पद हालचाली ओळखणे तसेच या सर्वांची वेळोवेळी सुरक्षा दलांना माहिती देणे, याबाबत मार्गदर्शन केले जाते. तसेच त्यादृष्टीने प्रशिक्षितही केले जाते. असाच कार्यक्रम सोमवारी तटरक्षक दलाने वरळी किनारपट्टीवर घेतला.

तटरक्षक दलाच्या पश्चिम विभागाचे कमांडर व्ही. डी. चाफेकर यांनी सागरी संरक्षण व समुद्री सुरक्षा याबाबत मार्गदर्शन केले. ‘समुद्राची व किनारपट्टीची सर्वाधिक जाण मच्छिमारांना असते. यामुळे त्यांच्या तरुण मुलांनी तटरक्षक दलात यावे. ही त्यांच्यासाठी करिअरची आगळी संधी असेल,’ असे आवाहन चाफेकर यांनी केले.

समुद्र हा कायम बेभरवशाचा असतो. तो कधीही खवळू शकतो. अशावेळी खोल समुद्रात असताना आपत्कालिन स्थिती निर्माण झाल्यास काय करावे, याबाबत या कार्यक्रमात तटरक्षक दलाकडून प्रात्यक्षिकासह माहिती देण्यात आली. जीवरक्षक जॅकेटचा वापर कसा करावा, हे दाखविण्यात आले. यासाठी ३०० मच्छिमारांना जीवरक्षक जॅकेटचे मोफत वितरणही करण्यात आले.

(स्रोत : मटा)