Colleges are Closed due to Corona : करोनामुळे यंदा मोठ्या प्रमाणावर व्यावसायिक अभ्यासक्रमांच्या कॉलेजांनी संस्था बंद करण्याचा निर्णय घेतला आहे. परिणामी विविध अभ्यासक्रमांच्या सुमारे दीड लाख जागा कमी होणार आहेत..

इंजिनीअरिंग, मॅनेजमेंट, फार्मसी आणि इतर व्यावसायिक अभ्यासकमांच्या बहुतांश कॉलेजांनी संस्था बंद करण्याचा निर्णय घेतला आहे. यामुळे सुमारे दीड लाख जागांची कपात होणार असल्याचे समोर आले आहे.

शैक्षणिक वर्ष २०१९-२०मध्ये बंद करण्याचा अर्ज केलेल्या बहुतांश संस्थांनी २०२०-२१साठी संस्था सुरू करण्याची परवानगी मागितली नाही. अखिल भारतीय तंत्रशिक्षण संस्थेची मान्यता असलेल्या सुमारे १७९ व्यावसायिक कॉलेजांनी कॉलेज बंद करण्याची परवानगी मागितली आहे. यात सर्वाधिक कॉलेज हे उत्तर प्रदेशातील ३१ तर महाराष्ट्र आणि तामिळनाडू येथील प्रत्येकी २२ कॉलेजांचा समावेश आहे. यामुळे यंदा व्यावसायिक अभ्यासक्रमांसाठी स्पर्धा असणार आहे. परिषदेने यंदा १६४ नवीन संस्था सुरू करण्याची मान्यता दिली आहे. तर एक हजार ३११ कॉलेजांना जागा वाढविण्यासाठी मान्यता दिली आहे. मात्र सद्यस्थिती लक्षात घेता बहुतांश नव्या कॉलेजांनी यंदा शैक्षणिक वर्ष सुरू करण्यास नकार दिल्याचेही समजते आहे.

इंजिनीअरिंग आणि व्यावसायिक अभ्यासक्रमांमध्ये रिक्त राहणाऱ्या जागांची मोठी समस्या गेल्या अनेक वर्षांपासून समोर येत आहे. यामुळे गेल्या काही वर्षांपासून अनेक संस्था कॉलेजे बंद करण्यासाठी अर्ज करत आहेत. यंदा करोनामुळे बंद करणाऱ्या संस्थांच्या संख्येत वाढ झाल्याचे समोर आले आहे. यंदा देशभरातून इंजिनीअरिंगचे ७२ कॉलेज, एमबीएचे ५८ तर डिप्लोमाचे ७१ कॉलेजे बंद करण्यात येणार आहेत. यामुळे ३४ हजार ५५३ जागा कमी होणार आहेत. याचबरोबर काहींनी वर्ग खोल्या कमी केल्या आहेत. अशा ७६२ संस्थांमधील सुमारे ६९ हजार ९६५ जागांची कपात होणार आहे. तर काही कॉलेजांनी जागा वाढ तसेच अभ्यासक्रमवाढीसाठी केलेले अर्जही मागे घेतले आहेत. यामुळे यंदा काही कॉलेजांमध्ये प्रवेशासाठी चुरस पाहावयास मिळणार आहे.

सोर्स : म. टा.