Beware of SMS Gang – मित्रांनो, सध्या SMS टोळीच्या मेसेज अनेक युवकांना जाहिराती द्वारे आपल्या जाळ्यात ओढत आहेत. यात  किमान दहावीपासून इंजिनिअरपर्यंतच्या नोकऱ्या आमच्याकडे उपलब्ध असे यात सांगितले जाते. तसेच शिक्षणाच्या पात्रतेपासून पगाराचे किती पॅकेज व कोणकोणत्या सुविधा अशी भूलविणारी माहिती घातली जाते. यातून शहराचे आकर्षण आणि रोजगाराची आशा यामुळे बेरोजगारांची यात फसगत होते.

अशी केली जाते फसगत…

– मेसेजवर केवळ आकर्षक पगार व सुविधा आणि संपर्क क्रमांक. यात कंपनीचे नाव किंवा वेबसाईट याचा उल्लेख नसतो
– गरजूकडून मेल ऐवजी व्हॉटस्‌ऍपवर कागदपत्रे मागवून घेणे
– दोन दिवसांनी नोकरी मिळाली आहे, मुलाखतीला या असा मेसेज पाठवणे
– मुलाखतीचे ठिकाण कंपनीऐवजी कोणतेतरी गाव किंवा तात्पुरते उभारलेले ऑफिस
– उमेदवाराकडून मुळ आधारकार्ड, शैक्षणिक कागदपत्रे ताब्यात घेणे
– पाच-सहा गरजू जमा झाल्यावर गाडीत घालून लांबून कंपनी दाखविली जाते
– कंपनीसोबत करारासाठी दहा ते बारा हजारांची मागणी. पैसे मिळाले की गणवेश, बुटासाठी पुन्हा मागणी
– नोकरी नको असे म्हणणाऱ्यांना मूळ कागदपत्रे देण्यासाठी पैसे घेतले जातात

– नोकरी आणि प्रत्यक्षातील नोकरी यात प्रचंड तफावत असते. मध्यम किंवा लघू कंपन्यांना साहित्य पुरविणारा हा छोटा उद्योग असतो. पोस्ट मॅनेजरची; मात्र हमालीची कामे लावली जातात. कोणताही करार केला जात नाही. दहा ते बारा तास काम करावे लागते. भोजन व निवास व्यवस्था म्हणजे निकृष्ट जेवण आणि एक साधी खोली असते. त्यामुळे एका महिन्यात हा जॉब सोडला जातो. आपण फसलो आहोत या भावनेमुळे कोणी पोलिसात तक्रार करत नाही.

ही घ्या काळजी…

– स्वत:ची शैक्षणिक पात्रता, कौशल्य पहा आणि पगार किती मिळू शकतो यावर
स्वत:लाच अजमावा
– सोशल मीडियावर फिरणाऱ्या किंवा कर्णोपकर्णी समजणाऱ्या नोकरी संधी माहितीवर विश्‍वास ठेवू नका
– थेट कंपनीची वेबसाईट पहा, एचआर विभागाशी मेलव्दारे संपर्क साधा
– नोकरी कोणत्याही मध्यस्थीमार्फत मिळविण्याचा प्रयत्न करू नका, तसेच
त्यासाठी पैसे देवू नका
———————–

अधिकृत नोकरी अशी मिळते…

– कोणतीही कंपनी कामगार भरतीसाठी त्यांचे अधिकृत संकेतस्थळ किंवा कंत्राटी कामगार पुरवठादार किंवा कॅम्पस इंटरव्हू याचा वापर करते
– कंपनी आवारात प्रशासन विभागाकडून कागदपत्रे तपासणी, मुलाखत आणि कौशल्य चाचणी, शारिरिक तंदुरूस्ती घेतली जाते.

-कोणतीही पैशाची मागणी नसते.