जिल्हा शल्यचिकित्सक कार्यालयांतर्गत असलेल्या रुग्णालयांमध्ये क्लासवन डॉक्टरांच्या ४६ मंजूर पदांपैकी २२ जागा रिक्त आहेत. त्यामुळे गंभीर आजारांवर त्वरित उपचार मिळण्यास अडथळे निर्माण होत आहेत.

सर्वसामान्य नागरिकांना मोफत व दर्जेदार आरोग्यसेवा मिळावी यासाठी जिल्हा व ग्रामीण रुग्णालये महत्त्वाची भूमिका बजावतात. मात्र, रिक्त पदांमुळे रुग्णांना आवश्यक ते उपचार वेळेवर मिळत नाहीत.

आरोग्यमंत्री प्रकाश आबिटकर दोन दिवसांच्या जिल्हा दौऱ्यावर असून, या भेटीत रिक्त पदांबाबत ठोस निर्णय होण्याची अपेक्षा आहे. सध्या जिल्ह्यात १४२८ मंजूर पदांपैकी ३०८ पदे रिक्त आहेत, त्यापैकी जिल्हा रुग्णालयातच १४७ जागा रिक्त असल्याचे आरोग्य विभागाने स्पष्ट केले आहे.

विशेषतः, जिल्हा रुग्णालयात १२ क्लासवन डॉक्टरांची पदे रिक्त असून, अचलपूर महिला व बाल रुग्णालयासह इतर ग्रामीण रुग्णालयांमध्येही डॉक्टरांची मोठी कमतरता जाणवत आहे. त्यामुळे सरकार या रिक्त पदांची भरती कधी करणार, याकडे सर्वांचे लक्ष लागले आहे.