रुग्णालयांची पदभरती रखडली

New Recruitment Process is on hold in Arogya Vibhag

नवीन पदनिर्मितीस आरोग्य विभागाने मंजुरी देऊनही कामकाज ठप्प

राज्यातील बांधकाम पूर्ण असलेल्या एकूण ७१ नवीन आरोग्य केंद्रांसाठी पदनिर्मितीस आरोग्य विभागाने मंजुरी दिली आहे. यामध्ये नगर शहरातील महिला व नवजात शिशु रुग्णालयाचा समावेश असून या रुग्णालयासाठी पदनिर्मितीस मंजुरी मिळाली आहे. त्यानंतर मात्र पुढील कार्यवाही ठप्प झाली आहे. आरोग्य विभागाने अद्याप पदांची भरती केलेली नाही. त्यामुळे सध्या जिल्हा रुग्णालयांमार्फतच या रुग्णालयाचे कामकाज सुरू आहे.

राज्यातील एकूण ७१ आरोग्य केंद्रे व दोन उपजिल्हा रुग्णालये, चार महिला रुग्णालये, अपंग पुनर्वसन केंद्र, आयुष विभागासाठी पदनिर्मिती होणार आहे. नगर शहरातील महिला व नवजात शिशु रुग्णालयांसाठी वैद्यकीय अधीक्षक, वैद्यकीय अधिकारी, निवासी वैद्यकीय अधिकारी, प्रशासकीय अधिकारी, कार्यालय अधीक्षक, लिपीक, औषध निर्माण अधिकारी, रक्तपेढी तंत्रज्ञ आदी नियमित पदे, तसेच आहारतज्ज्ञ, प्रयोगशाळा तंत्रज्ञ, बाह्यरुग्ण सेवक, प्रयोगशाळा परिचर, रक्तपेढी परिचर, कनिष्ठ लिपीक, शिपाई अशा एकूण ९७ पदांची निर्मिती केली जाणार आहे. या पदनिर्मितीस मंजुरी मिळाली आहे, त्यामुळे पुढील कार्यवाही तत्काळ सुरू होणे अपेक्षित होते. परंतु, याकडे दुर्लक्ष करण्यात आले आहे. आरोग्य उपसंचालक कार्यालयाकडून पदभरतीस सुरुवात केली नसल्याची माहिती आहे. यासाठी किती कालावधी लागेल याबाबत जिल्हा रुग्णालयातील वैद्यकीय अधिकाऱ्यांना निश्चित माहिती नाही. त्यामुळे संभ्रम निर्माण झाला आहे. सध्या जिल्हा रुग्णालयाच्या नव्या इमारतीत तात्पुरत्या स्वरुपात रुग्णालय सुरू केले आहे. या रुग्णालयासाठी नवीन पदांची भरती झालेली नाही. त्यामुळे जिल्हा रुग्णालयातील वैद्यकीय अधिकारी व कर्मचाऱ्यांमार्फत कामकाज सुरू आहे. जिल्हा रुग्णालयात आधीच मनुष्यबळाची कमतरता जाणवत आहे. त्यामुळे येथे कामाकाजाचा ताण वाढला आहे.

हक्काची जागा सोडणार?

या आधी रुग्णालयासाठी जुन्या सिव्हिल हॉस्पिटलची जागा निश्चित करण्यात आली होती; परंतु येथे महापालिकेने वाहनांच्या पार्किंगचे नियोजन केले होते. त्यामुळे ही जागा सिव्हिलला मिळण्याची शक्यता नव्हती. येथे रुग्णालय सुरू करण्यासाठी बराच कालावधी लागणार आहे. त्यामुळे येथे रुग्णालय सुरू करण्याचा विचार आरोग्य विभागाने आता सोडून दिल्याचे दिसत आहे. जुन्या सिव्हिलऐवजी सध्याच्या सिव्हिल हॉस्पिटलमधील नव्या इमारतीत रुग्णालय सुरू केले आहे.

नगर जिल्हा मागे

बुलडाणा जिल्ह्यात रुग्णालय सुरू करण्यात आले आहे; तसेच पदनिर्मितीही करण्यात आली आहे. नगर जिल्हा मात्र यात पिछाडीवर आहे. पाच वर्षांनंतरही रुग्णालयाच्या जागेचा तिढा कायम आहे. त्यानंतर आरोग्य विभागाने रुग्णालयासाठी पदनिर्मितीचा प्रस्ताव मंजूर केला खरा मात्र पदभरती रखडली आहे. लोकसभा आणि त्यापाठोपाठ राज्यातील विधानसभा निवडणुकांमुळे हा मुद्दा मागे पडला होता. या निवडणुकांनंतरही अद्याप पदभरती सुरू केली नसल्याची माहिती आहे.

म. टा.

अन्य महत्वाचे जॉब्स !!

१० वी पास उमेदवारांसाठी जॉब्स१२ वी पास उमेदवारांसाठी जॉब्स
पदवीधर उमेदवारांसाठी जॉब्सपदव्युत्तर उमेदवारांसाठी जॉब्स
बँक जॉब्सइंजिनिअरिंग जॉब्स
अपंग उमेदवारांसाठी जॉब्सITI पास उमेदवारांसाठी जॉब्स
खाजगी जाहिरातसरकारी जाहिराती
वैद्यकीय जाहिरातरेल्वे जाहिराती

Leave A Reply

Your email address will not be published.

MahaBharti.in      |        डाउनलोड महाभरती अँप
Close Bitnami banner
Bitnami