लवकरच ८००० पदांची महाभरती होणार

गेल्या पंचेवीस वर्षांपासून रखडलेली विमा क्षेत्रातील तृतीय श्रेणी कर्मचाऱ्यांची भरती प्रक्रिया आठवडाभरात सुरू होण्याची शक्यता वर्तविण्यात येत आहे. याअंतर्गत संपूर्ण देशभरातून आठ हजार जागांची पूर्तता करण्यात येणार आहे. तृतीय श्रेणी कर्मचाऱ्यांची पदभरती प्रक्रिया सुरू झाल्यास विमा क्षेत्रातील मनुष्यबळाचा अभाव काही प्रमाणात कमी होणार आहे.

गेल्या २५ वर्षांत वर्ग तीनचे जवळपास २७ हजार कर्मचारी बढती किंवा निवृत्तीमुळे पदांवर कार्यरत नाहीत. परिणामी, रिक्त जागांची पूर्तता होणे आवश्यक आहे. सद्य:स्थितीत संपूर्ण देशभरात विमा कर्मचाऱ्यांची संख्या १ लाख दहा हजारांइतकी आहे. यातील वर्ग तीन आणि चारमधील कर्मचाऱ्यांची संख्या ५७ हजार, तर वर्ग एकचे कर्मचारी ३१ हजार आणि दोनचे कर्मचारी २२ हजार आहेत. वर्ग तीनमध्ये प्रामुख्याने लिपिकांचा समावेश होतो. विमा क्षेत्राच्या कामकाजाचा विस्तार पाहता लिपिकांची मोठ्या संख्येने गरज आहे. पण, रखडलेल्या पदभरतीमुळे कार्यरत कर्मचाऱ्यांवरील कामाचा ताण वाढला आहे. याबाबत विमा कर्मचारी संघटनांनी वेळोवेळी सरकारला निवेदन दिले. तसेच आंदोलन, निदर्शने, धरणे आदींच्या माध्यमातून पदभरतीची मागणी रेटण्यात आली आहे. नुकतीच नॅशनल ऑर्गनायझेशन ऑफ इन्शुरन्स वर्कर्स (एनओआयडब्ल्यू) या आयुर्विमा महामंडळात कार्य करणाऱ्या संघटनेच्या केंद्रीय कार्य समितीची दोनदिवसीय बैठक नागपुरात झाली. बैठकीमध्ये पदभरतीचा मुद्दा मांडण्यात आला होता. तसेच एकदिवस गेटसभा घेऊन सरकारदरबारी गाऱ्हाणे मांडण्यात आले. दरम्यानच्या काळात पदभरतीच्या मुद्यावर सातत्याने दबाव टाकण्यात आला आहे. परिणामत: आठवडाभरात विमा क्षेत्रातील तृतीय श्रेणीची पदभरती प्रक्रिया सुरू होण्याची शक्यता सूत्रांनी व्यक्त केली आहे.

कामाचा बोझा हलका होणार

२६ शाखा कार्यालय आणि दहा सॅटेलाइट कार्यालयांच्या साहाय्याने नागपूर मंडळाचे कार्य सुरू आहे. याशिवाय संपूर्ण देशभरात ४ हजार ८५१ कार्यालये, एक लाखाहून अधिक कर्मचारी, ११.७९ लाख एजंट आणि २९.०९ कोटींहून अधिक पॉलिसीधारक आहेत. यामध्ये सर्वाधिक महत्त्वाचे तृतीय श्रेणी कर्मचारी आहेत. तृतीय श्रेणी कर्मचाऱ्यांमध्ये लिपिकाचा समावेश होतो. आयुर्विमा क्षेत्राचा वाढता विस्तार पाहता लिपिकांची संख्या त्या तुलनेत वाढलेली नाही. नवीन पदभरती झाल्यास कामाचा बोझा हलका होऊ शकणार आहे.


अन्य महत्वाचे जॉब बघा..

Leave A Reply

Your email address will not be published.

व्हाट्सअँप वर जॉब अपडेट्स मिळवा !